Tèngkana Orèng Aparloa


Oleh: Syaif Zhibond Renk Qobhien*
Nak-kanak sè pon abhâkalan, tandhâna pon para' depa'a ka tojjhuânna rèng abhâkalan, ngghi rua akabin. Nak-kanak sè pon mare akabin (sirri/resmi) biasana eparloe/esalametthi bik rèng tuana. Umumma ekomantani angghui pangias se mapan. Ngonjhâng bhâlâ tatangghâ mallè akompol è acara salamettan.
Tapè sabellunna aparlo, bâdâ pan berempan tèngka sè èjhâlâni bik tuan rumah. Pertama-tama, nyarè dhina se teppa'. Biasana atanya ka orèng sè ngarte bitongan bulen, are bân bekto sè teppa'. Polana Mon sampe' salah ngala' dhina, bisa bede dibudina. Mon tak palang car pencaran, atokar malolo otabe mate salah settong komantan marena aparlo. Mangkana benya' Reng tua kona takok ongghu nyare dhina. Pengit Ben sangat tengate. Mon ca'na bebele'en kona," bengo' repota e ade' etembheng repot ebudi ".
Nyarè dhina nèko èjhâlâni jheu are sabelunna ngantanga parlo. Bede se sataon sabelunna, bede se nem bulen sabelunna. Malah bede se nyare dhina ebekto calon komantan ghi' bede e kandungan, ghi' tak lahir. Mon tengka segheniko biasana umum e dhisa deje'enna. E podei, ghili ben sekitarra. Bikan Mon sanonto, bhe' bede' e tengka se mara gheniko. Mon lambe' bule ngeding careta Deri kae, ghi' bede e tabu' pon enyareaghi dhina. Bile se epabhekalana'a, epakabina, eparloana'a, angguye tattaroppa sapa, neko pon mare e kacator bik pade Reng tua. Bhuh, Mon pas sanonto ghi' bede tengka se mara gheniko, ta' kera ta' lebur Mon eterrappaghi e situbendhe.
Nomer due', bile pon mare nemmu dhina se teppa', selanjutthe nyiappaghi kabhutoanna parlo. Pertama kabhutoanna depor. Oreng aparlo neko bhekal makanana'a oreng sajheghet. Bhuto dhe'eren se sajheghet. Utamana bherres bi' jhuko'. Bherres bi' Jhuko' neko Mon delem parlo, tak emassa' ka kompor. Mata' engghi ongghu, ngabi'e sanape ka gas. Biasana etana' ka Tomang. Tantona bhuto benya' kaju tono. Kaju tono biasana e mogherreghi e pakarangan.

Mon pon depa' ka bektona mogher kaju, bhele tatangghe neko ta' ambhut pentae tolong, benya' se deteng nolongi. Se andi' lako, nyellang ghellu ka angghuy nolongi tuan rumah. Bede se mogher kajuna, bede se maspas ranca'na, ngangko' kajuna, bede se mecal madheddhi kaju se raje dheddhi keni' malle lekkas kerreng. Bede se pera' ju' toju' ngabes oreng se alalakon. Biasana dengodena se ampo pera' ngampong ajerukkong. Tape kompak, tade' se nyoro tade' se menta Langsong bhen sabbhen jek-ajheghen nolongi tuan rumah se aparloa.
Etengnga oreng alalakon ngangko' kaju, tuan rumah biasana makaluar biddheng  bik roko'. Bede se aberrik ghik wal-awal, bede se neng pertenga'an. Kabbhi jhek-ajheghen e cellok bik tuan rumana kaangghui ngenom biddheng bik arokok. Mare gheniko etoro'e makaluar nase'. Jhek-ajheghen esoro Ambu ghellu alalakon. Esoro adhe'er ghellu sambi istirahat sakejjhe'. E bekto istirahat gheniko biasana jhek-ajheghen ampo aghejek, acareta perghina, cabbhina, regghena jheghung, kadheng nyator politik se bede e tipi, Mon sanonto, benyak senyator patenggien, polana pon para' kare tello bulen agghi'.
Mare nyiappaghi kabhutoanna depor, Nomer Tello' elanjuttheghi messen tattarop, pajhengan, lampu ben nyare sape. Tattarop rua bede se deri bidhik, tattarop kona, Ben bede se deri kaen bik besse, bek modern pon. Mon tattarop se angghui bidhik benyak lalakonna. Mon jhek-ngajheg oreng rua dheddhi kompak. Keng Mon tattarop kaen, jhek-ajheghen tade' lakona, pera' nolongi ngabes. Semoga benyak alalakon tokang masangnga dhibik. Mon Reng tua kona lebih senneng ngangghui tattarop bidhik, lebih kompak ka jhek-ajheghen tekka' bentu'na lebih rapi tattarop kaen. Mon e daerana bule pon sakoni' se angghui tattarop bidhik, aleburen tattarop kaen cakna. Oreng se andi' tattarop kaen biasana Endi' pajhenganna pangias gia. Reken pon nyettong lengkap bik salonna. Kadheng bede se lengkap sampe' penyiarra. E daerah jhengkar benya' se ngak gheniko.
Sape se ebhellie kodhu se adheghing. Mon se koros tako' tak cokop. Biasana melle e pasar kemisan otabe sattuan. Se bheghus e ka Jhuko' biasana sape podei se berna mera. Dheghingnga kessap Ben serra'. Mon edaerana bule rua lambe' benyak nyare sape podei Mon ekaghebeye parlo. Engghi rua, tekka' koros dheghingnga serra', pokok tokang deporra ngarte carana magi. Mon tak ngarte ka Jhuko', dhina tekka'na pon lempo sapena, eabi' pagghun Mon tak ngarte carana ngemmal Jhuko'. Mon e dinto umumma bu' Asbiyeni se dheddhi tokangnga Jhuko'.
Nah, oreng se endi' niat nangghe'e tabbhuen, biasana jheu are pon entar ka jhereghenna tabbhuen, nyabe' dhina. Bede oreng se sampe' ngobe dhina se pon mare ekarembhek ebengkona demi bisana tabbhuen. Sataon sabellunna pon mesen ka ade'. Engghi. Mon e dhisana bule umumma nangghe' tabbhuen. Bede e dhisa Laen kadheng nangghe' orkes, gambus, kiae, lawak ben en laenna. Keng Mon e dhisana bule pon umum, Mon aparlo nangghe' tabbhuen. Ta' pera' oreng se soghi se bisa nangghe' tabbhuen. Tekka' ta' andi' nape, abhelengngaje nyare otangan demi mabhunga bhele tatangghe. Neko tengka Mon e daerana bule, Situbendhe begien jhe temor.
Tak mare e dinto, bede pole tengka se kodhu e jheleni oreng se aparloa. Bule acareta'a e tolesanna salanjutthe ghih....
 *) Lalake' se siap menikah


Tèngkana Orèng Aparloa Tèngkana Orèng Aparloa Reviewed by takanta on Agustus 02, 2019 Rating: 5

Tidak ada komentar