Apalessèran ka Pèngghir Sèrèng Blekko'

Si Posel (Firman Abadi)

Sè Ngangghit : Kyaè Nabuy

Acarèta bhâb kennengnganna palessèran panèka ḍâri koṭṭa Situbânḍâ ra-kèra korang langkong 8 km mongghing bârâ' bâḍâ sèttong koṭṭa kacamathân nyama èpon Panarokan. È ka'ḍissa' bâḍâ dhârmaghâ anyar teppa'na è Ḍhuson Somangka'an. Bâjâ ḍung-onḍungan ra-kèra asar mabâ ḍâri dhârmaghâ ka'ḍinto ajunan nèngal ka mongghing bârâ' lao' sakonè', è ka'ḍissa' ajunan bhâḍhi mangghi bhârisân bu-tombuwân sè bhânget pek-pek tor jhenno, pas è co'-konco'na ètèngghâ'i mano' sè sakalangkong bânnya', mano' sè abulu potè kantos kaoladhânna cè' ènḍhâna tor asrè. Pa'anaobhânna jâ'-sajâ'â nèngal tombuwânna kembhâng malaṭè sataman sè ghi' bhuru mekkar ḍâri mekkona kembhâng ghâpanèka.

Manabi terro lebbi ceṭṭa, lebbi palasdhâ, lebbi ghenna', lebbi jhârna' bân na'-na' tantona lebbi semma' ḍâ' pangghunan ka'ḍinto. Èngghi ngèrèng terrossaghi polè parjhâlânan ka'ḍinto karè sakoni'agghi' ra-kèra korang langkong sakilowan ka bârâ' ḍâri dhârmaghâ ka'dissa' ajunan bhâḍhi tapangghi ḍâ' dhisa Klaṭakan Kacamathân Kenḍhi'. Klaṭakan panèka anḍi' koṭṭa kènè', ca' èpon rèng seppo kona nyama èpon Kotasè', asal oca' ḍâri ko-bengko è pèngghir tasè'. Èstona ḍhuson panèka pasèsèr, è ka'ḍissa' è pèngghir tèmorra sakola'an SD bâḍâ jhâlân ghâng sè bâḍâ labâng gâliḍigghâ a serrat "Kampung Blekok". Kampong blekok panèka samangkèn rammè è ḍâtengngè rèng-orèng ḍâri man-ka'ḍimman, mala bâḍâ jhughân ḍâri manca kabhupatèn akadhiyâ Bândâbâsa, Jember bân Probolinggo. Pantai Blekok panèka èstona kennengnganna è ghir sèrèng è pasèsèr Klaṭakan. È ghir sèrèng panèka bhungkana kaju pè-apè tombu cè' jhennona, cè' ghumbheddhâ kantos èkoca' alas pè-apè. Ḍâri ghumbheddhâ kaju pè-apè panèka sè andhâddhiyâghi mano’ dhâlko’ lajhu perna cè’ pernana, amarghâ ta’ sakonè’ dhâlko’ sè alèbun è kennengngan panèka, pas ènyamaè otabâ èsebbhut kampong dhâlko’ (kampung blekok). 

Parlo èkaghâli sè rabu ḍâ’ kennengngan ka’ḍinto ta’ namong neng è pèngghir bisaos bisa ka tasè’na. Manabi aèng tasè’ asat kèngèng ka tengnga lantaran ampon bâḍâ dhârmaghâna sanajjân ḍâri kaju. Manabi kalerressan aèng tasè’ sorong, kèngèng nambhâng sampan kènè’ saos. Karana ghi’ bhuru abhâbhâd, tantona salagghi’ bânnya’ kakorangan-kakorangan.

Coma caraèpon manabi ajunan ampon tandhuk ka kalaṭakan è pèngghir tèmorra SDN 2 Kalaṭakan panèka ḍâri lorong rajâ pas maso’ jhâlân ghang ka ḍâjâ ka pakarangan maghârsarè è ka’ḍissa’ manyèsè ka tètèyan èpon. Sa’amponna ka’ḍinto bâḍâ sè ajâgâ majâr karcès ra-kèra Rp. 2000,- otabâ langkong samporna tandhuk ḍâ’ pèngghir sèrèng panèka, è ka’ḍissa’ ajunan bhâḍhi tapangghi ḍâ’ ènḍhâna pa’anaobhân alam pasèsèr tor asrèna kaju pè-apè sè possa’ sareng dhâlko’. Ponapa polè è mongghing bârâ’ arèna ampon nongghul ghunong, ènḍhâ tor asrè ongghu pa’anaobhân pantai blekok panèka sareng alam sè sakobhâng èpon, atè cè’ sennengnga, pèkkèr cè’ pernana, acora’ ta’ kabhuru palèmana, dhâddhi sapanèka akadhiyâ ca’-oca’an :

Sampèr apek èkarobung nyarowan

Ngala’ lèghin ḍu bâḍâ tekko’

Pèkkèr sompek ngalamon ta’ karowan

Ngèrèng aghin-pangghin è pantai bleko'