Carpan: Sapo' Mardha



Oleh: Helmy Khan

Kadang, bila mare Mahrib saellana mare abajang sengko' aromasa badha settong duri se nyakcak e dhadha. Masse ta' maloka, tape sake'na ekarassa jha' jareya aropa'agi settong panyake' se agabay odhi'na sengko' talka. Jha' senga egambarragi, duri se aerrem e dhadha, sajan abit atamba dhalem ngorek talampo'anna ate.

Tanto ba'na padha atanya, ra-kera masalah apa se agabay sengko' reya andhi' pekkerean se padhana e attas rowa. Saenggha ajalane odhi' katon bannya' dhusa dha' se Kobasa ban cepta'anna.

Saongghuna kadaddhiyan reya amola tello taon se tapongkor. Tello lokkek teggal se badha e Toteker se aropa'aghi sangkolanna mama' ebabad, epadaddhi tamba'na odhang. Bakto jarowa sengko' mekker jha' mon teggal se ta' sabarampa loarra rowa mon ekagabay tamba' bhakal ngasele kalaban pangaselan se tamba raja.

Saellana masepa' parembagan ban Mat Talwan, sengko' amet ka embu', jha' teggal rowa ebanguna tamba'. Kalaban ca'-oca' hasel parembagan gella', aba' yakin jha' embu' bhakal ngestowagi teggal sangkolanna mama' epadaddhi tamba'na odhang.

Tape sangka'anna sengko' jau dhari oca' samporna. Masa embu' tao jha' teggal se bannya' etombuwi bungkana nyeor ban tarebung epadaddhiya tamba', embu' alang-alang kalaban kakobateran se aca'-ranca' manyettong dha' sangka'an jhuba'.

"Tadha' se lebbi bagus rizki se ekaolle salaenna atane, otabana amanfaattagi tombuna perghi," oca'na embu' kalaban dhadha etapet.

Angen se ngalesser nyengkap kalambu ta' agabay sengko' arassa cellep, tape sabaligga, sengko' aromasa apa se ella epadhapa' ka embu' padhana se matta.

"Padha bai ganeka, Bu'. Tamba' ganeka kan ebanguna e attasanna tana tibi'. Napa sampeyan ta' terro padha'a  ban oreng laen se ampon sukses abangun compo', garowa ekaolle dhari hasella tamba'!" sakadar maelang panassa ate, sengko' asangaja matenggi soara, kalaban arebban embu' tao apa se ekaterrowe sengko' molae ghi' bilan.

"Teggal rowa ella bannya' abanto aba', kala'  nyeorra ban la'angnga la cokop gabay kabutowanna sabala," totorra sambi mateppa' kancengnga kalambi se ejai'.

"Puh, mon paggun nga' neka ta' kera ta' tolos se pagguna daddhiya reng bungkaladan."

Saellana nyelen rassa kaceba kalaban ca'-oca' e attas, sengko' kalowar nonjjhu dha' morlao'. Soko se atengka' arassa berra'. Dhadha panas akadiya epanggang e attas mardha. Apa salana teggal se ta' sabarampa rowa ebangun tamba', ketembang gunna ekala' nyeorra ban ta' tanto hasella, lebbi bagus epaddhi tempat usaha se bakal ngasele se lebbi raja.

Sengko' andhi' rencana padhana reya tanto ta' saromban nyolbu' dhalem ate. Tape pangaterro se ella abit tombu e dhadha reya aropa'agi settong pangaterro se ella bannya' abukteyagi baramma reng-oreng se andhi' tamba' majembar aba'na kalaban ontong se raja.

Sengko' mekker, tantona senga sengko' andhi' tamba', sengko' bakal gampang ngaolle apa se ekaterrowe aba', abangun bengko, melle motor, tantona jugan manyata mempe alamar Mila se ella abit dhaddhi gantonganna ate.

Saellana mama' adhinggal omor, teggal tello lokke' rowa ta' bisa eandallagi pole ka angguy nyokobi kabutowanna sabala. Mon gun ekabaya kasab ban are tantona cokop, tape kaangguy epadaddi sempenan rassana buto bakto se abit kaangguy ngarassa'agi negghu' pesse bannya'.

Melana dhari jareya, sengko' ban Mat Talwan aparembagan abanguna tamba' e attasanna teggal sangkolanna mama'. Masalah biaya, tantona reya urusan gampang dha' Mat Talwan. Sengko' cokop nyadiya’agi tempat se ekagabaya tamba'na odhang.

Ta' egarassa, massena sengko' atengka' kalaban rassa soko se berra', aherra dhapa' ka teggal. Ta' jauh dhari bungkana tarebung se ondung ka lao', rencanana ejadiya ekabagaya ligiliyanna aeng bila ebuwanga ka tase'.

"Baramma, tolos se abanguna tamba'?"  Mat Talwan ageppa' balikat dhari budi, agabay sengko' takerjat.

"Bha... Iya tolos, Wan. Sengko' narema'a rantana laju dhari ba'na. Jha' bila ba'na madaddiya, akabar ka sengko', polana duggenna ekala'a gallu," jawabba sengko' kalaban oca' se ongguwan.

"Ba'na mare abala la ke embu'na?" Deg! Apa se etanya'agi Mat Talwan agabay ate dul-jeddulan.

"Gampangan masalah jareya. Ta' usa kobater ba'na. Paggun lancar," kalaban oca' jareya sengko' ausaha'agi aberri' kapasteyan jha' bakal lancar apa se ella daddhi parembagan molae bari' mola. Masse sanyatana embu' ta' aberri' esto dha' rencana se ella ekabala sengko' gella' seyang.

***

Tello are saellana atemmo ban Mat Talwan ban aberri' kapasteyanna aba' jha' satuju dha' parembagan se ella ekacator molae bari' mola, aherra pungkana nyeor e teggal rowa epoger.

Salenna bungkana nyeor, bungkana tarebung ban pan-barampan ka’-bungka'an selaen noro' gemmet keya ban mo'-ramo'na. Teggal se tello lokke' rowa langsung rata. Bates tabun kanan kacerra epatengghi kaangguy bannya' nampong aeng.

Ca'na Mat Talwan, bibit odhang ella ekerem. Sateya gun kare nyare parembun se nyaman, jha' bila rakera bakto se nyaman ka angguy nyabbur odhang ka tamba' rowa.

Bulan se aerrem e budhina ondhem agabay malem se petteng sajan orem. Jangrek ban giggiri padha amonye e paddhuna taneyan asella ban soarana messin diesel se ella bannya' etamen e gir-penggiraa tamba'.

Sabban, sabelunna ediya bannya' tamba' ebangun, dhisana sengko' reya sanget terkenal kalaban hasel nyeorra sebagus. Nyeor se ekala' dhari kebbun ekerem ka lowar polo, badha se ngoca' sampe' ka Bali.

Salaenna jareya, balungka' ban somangka bannya' keya oreng se namen. Jellas, kalaban badhana hasel kebbun dhari nyeor ban somangka masyarakat bagiyan dinna' melo keya tampesanna. Asabab, reng-oreng gampang ngaolle kalakowan, akadiya abanto jaragan nembang balungka', molong somangka ban matoron nyeor.

Tape saellanna tamba' arebbu' tana se etemenne bungkana nyeor ban kebbunna somangka, masyarakat bannya' se posang. Karana, kalakowanna ella sakone' bannya' padha elang asabab tamba'na odhang ta' gun coma ngakan tana, tape alat-lat keya dha'  kalakowanna oreng se bannya'.

Kalaban alasan reya, sengko' andhi' pangaterro agabaya tamba' keya. Padha ban apa se ekoca' sengko'  gella',  jha' hasella kebun dhari nyeor ella ta'  bisa eampuwagi pole. Karana ca'na reng-oreng se padha andhi' kebbun—tana edinna' ella ta' bagus pole ka angguy ngasellagi nyeor se maso' dha' kualitas se super.

"Ma' bangal ongghu ba'na arorosak e teggal rowa. Apa ba'na ta' tako' ka bala' se bhakal dhateng?" oca'na embu'. Sengko' cokop ngarte jha' apa se ella elakone sengko' masake' atena.

"Engghi napa mon samangken se ekalakowa, Bu'. Jha' nyeor e teggal pon ta'  bisa eampuwagi pole," sengko'  ajawab kalaban soara se alos.

"Ya dhina, mandhar bajjra'a bai," embu' nyambung jawabba sengko' kalaban pangarep se ragu.

Pendha' careta, bakto se abit padhana se sakejja'. Saellana tello bulan, odhang se ecabbur e tamba' ella dhapa' ka mosem ngangkes. Ban ollena onghu-ongghu raja.

Cokop ngabutowagi bakto lema' mosem angkesan odhang kangguy ngestowagi pangaterrona aba’. Roma se ella abit ekamempe sateya la sukses ebangun kalaban hasella odhang. Ta' gun coma kellar melle sapeda, tape sengko' andhi' kasempadan se lebbi raja, iya areya aropa'agi kamampuwanna aba' melle motor.

Massena sengko' sukses awujuddagi apa se daddhi pangaterro, tape sengko' ban masyarakat laen aroma korang samporna ajalane paparengnga se Kobasa. Karana papareng se lowar biyasa se epatoron Pangeran, nyatana abareng ban cabutanna rahmatta se laen. Iya reya aropa'agi aeng taber se badha e somor ella ta' cocok pole kaangguy eguna'agi dha'  kaparlowan laen.

Ta' gunna aeng taber se agante bau, bu-tombuwan ediya ella padha ta' tombu. Hal jareya, badha se ngoca'  asabab tana la tercemar kalaban badhana tamba'na odhang se arorosak ka bume.

Kaontongan se sengko' kaolle ta' sampe' abit. Rosagga bume ta' gun coma arorosag ka aeng taber ban bu-tombuwan. Tape odhang se badha e tamba' ella bannya' se mate.

Hal reya padha erassa'agi reng-oreng se padha andhi' tamba'. Sabab aeng se badha e tengah tamba' aobha panas, saengghana odhang se ecabbur ta' bisa odhi' kalaban bagus.

Ta' gunna jareya, ta' sakone' dhari reng-oreng se andhi' tamba'na odhang bannya' se rogi. Badha se sampe' buru ka Jakarta ka angguy notop otangnga ka bank se ekagabay bandha.

Nyatana apa se ella erassa'agi oreng bhakal teba keya ka sengko'. Polana hasel angkesanna odhang ba'ari' gun coma olle lema bella's kelu. Hasel jareya jauh dhari biyasana, se bisa sampe' noggha tello gintal otoba lebbi.

Sakeddhagan sengko' arassa kasta noro'e napsona aba' se terro dha'-padha'a ban bala tanggha se laen. Roma ella sukses ebangun, motor ella kellar ebelli. Tape apa gunana bila bume rosag, aeng enom bau, ban angen arassa panas.

Sateya gun cuma kare roma se raja, ban lampu se padha agarinap e bakto malem. Roma-roma se mantereng daddhi roma kosong. Tatanggha se biyasana agalajar ban motorra sajan abit atamba seppe.

Tamaso' Mat Talwan, se lamba' daddhi paleng soghina oreng sateya padha compet ka Jakarta.  Ca'na kabar Mat Talwan sateya raja otang karena tabalindet ka bungana bank se gabay modalla ka angguy abangun tamba' se lebbi raja.

Seppe tenga malem ta' enger pole ban monyena messin diesel. Malem sateya aropa'agi dhibudina sengko' tedung e roma se ekaolle dhari tamba'. Karana lagguna sengko' mangkadha keya nyosol tatanggha se laen ka Jakarta.

Angen se ngalesser ta' agabay aba' cellep, tape hawana bume ediya arassa panas. Kalaban dhadha etapet, sengko' ngapose aba' kaangguy ngeddha kalaban sapo' mardha. (*)

 

 

 

Biodata Penulis

Helmy Khan laher e Sumenep Madura. Lebur noles sanja’ ban carpan, sanonto akompol e settong komunitas se anyama Komunitas Damar Korong. Pan-barampan tolesanna ampon elombar ka media cetak ban online.

Carpan: Sapo' Mardha Carpan: Sapo' Mardha Reviewed by takanta on Mei 24, 2023 Rating: 5

Tidak ada komentar