Puisi Madura: Dika Kodu Tao Karya Agus Widiey

 

pixabay

Sanja’ Agus Widiey*

 

Dika Kodu Tao

 

dika kodu tao,

baramma rassana ngampet taresna

dhari lowas pangarep e ate

sampe' bunga ta' asat dhalem mempe.

 

e nagara bula

dika eyanggebba sagara

se ta' bangal edina nyengga

maske barat sajan raja

ban omba' terros agudha.

 

dika kodu tao,

maske aeng tabar e songai bula acampo

kalaban aeng accen se nyomber dhari mata dika

ja' kobater, esto e tang ate ta' kera lejjur padhana bato.

 

Topote, 2023

 

 

 

Tompangan

 

mabali tengka rassana berra' onggu,

akantha berra’na bakto abajanga sobbu.

 

ca'na bula

se aghabay rekong

gun bila nanggung kerrong

tape bila sanonto eker-pekker pole

gi' aberra'an tompangan se ta' re-mare.

 

dhu, baramma

odhi' arassa sella' badha e leggana.

 

Topote, 2023

 

 

 

Jalan Se Rosak

 

edina

   etorot

apa badhana.

 

arassa!

         huhuy.

 

Topote, 2023

 

 

 

Bila Apesa

 

apes rassana tang ate

bila se Kobasa ta' aberri' paste.

 

Topote, 2022

 

 

 

Ja' Ngemmes

 

pajat malarat ngodhi'ana dhapor

ta' ngeppul mon gun taona asokkor

kodu alako; mon menta todus padha-badha

sabab pera' ajulu tanang ban oca' mellas ekabandha.

 

apapole badha ca'-oca'an

"tanang e attas lebbi sae

etembang tanang e baba"

 

maddha alako pa-onggu angko

ja' ngemmes, kaniserre ana' poto

ban ja' lesso se makalowara pello.

 

Topote, 2023

 

 

 

Tanto Dika Tao

 

pekkeran sajan rengsa

sajjegga jau dhari pepe alossa

aba' se gun darma

matoro' sokma ka roba pornama

maske mardhana seppe

paste teba e laen are ka dhalem ate

sabab bungkana taresna

ta' gun ngembang kabunga'an saterossa.

 

tanto dika tao

e ranca'na ganeko

poko' padha bisa koko

bula ban dika bakal acampo.

 

Topote, 2023

 

 

 

*Agus Widiey, Laher e topote 17 Mei 2002. Kalowaran MI Darussalam Juruan Lao’, Kalowaran Mts sampe’ MA e Nurul Muchlishin, Pakondhang Rubaru, Songennep. Sanonto ajar noles e Jogjakarta.